БО АМАЛИ  СОЗАНДА  АЗ ПАРЧАМ  ДИФОЪ  НАМОЕМ

БО АМАЛИ  СОЗАНДА  АЗ ПАРЧАМ  ДИФОЪ  НАМОЕМ “Эҳтиром ва арҷ гузоштан ба парчам маънои арҷ гузоштан ба тамоми арзишҳои миллатро аз оғози таърих  то  ба имрӯз  дорад.  Эҳтироми ливо  арҷгузорӣ ба фарҳанги миллӣ, ба ниёгони тамаддунсозамон, эҳтиром ба миллат ва давлату давлатдорист”.                                                                                                                                                                              Эмомалӣ  РАҲМОН, Басо рамзист, ки Парчами давлатии Ҷумҳурии Тоҷикистон  дар  маркази пойтахти мамлакат шаҳри  Душанбе,  дар  паҳлуи Қасри миллат, дар баландие, ки аз тамоми шаҳр назаррас аст, пайваста парафшонӣ  мекунад.  Ҳамагон ба муҷассамаи бошукӯҳу  ҳамболи  ахтарон,  ки аз  лиҳози шукӯҳу  шаҳомат ба китоби рекордҳои «Гиннес»  ворид шудааст, бо меҳру муҳаббат ва сидқу садоқат дида медӯзанд,  ифтихор мекунанд.  Парчами миллии мо бо дурахшу парафшониаш ба ҷаҳониён аз ҳастиву пояндагии миллату давлати тоҷик, аз бахту саодат ва фатҳу нусрат  паём мерасонад.  Парчами миллӣ сари болои мо, дасти болои  мо,  бахти волои мо  ва  шуҳратафзои  мост.   Парчами давлатӣ  пайкараи  нангу номуси ватандорӣ, пайкараи  виҷдону имони  мост. Мардуми мо таъриху тамаддуни  ҷаҳонгир, фарҳанги  бойи илми  башарӣ  дорад. Парчамдорӣ  барои  аҷдодони  мо ҳанӯз  аз  замони  Сосониён  рӯи  кор  омадааст.   Далели  ин нуқта  достони  «Шоҳнома»-и безаволи  Абдулқосим  Фирдавсӣ мебошад.  Яке аз қаҳрамонони  марказии ин шоҳасар Коваи  оҳангар  пешдомони  чармии худро чун дирафш болои сар карда ба муқобили  Заҳҳоки  морон  мубориза  бурдааст. Парчами  давлатии  Ҷумҳурии Тоҷикистон  чун  рамзи давлатдориву соҳибистиқлолии тоҷикон   дар  арсаи  байналмилалӣ ифодагари  кишвари  сулҳпарвару   ваҳдатгарои мо мебошад. Дар ҳама давру замон мардуми худогоҳу худшинос ва  соҳибдавлатони  оқилу  донишманд, рамзи  шукӯҳу шаҳомати давлатдориро дар асоси арзишҳои миллиашон муайян месозанд.  Зеро ин арзишҳо дар шинохти давлатдорӣ  нақши бузурге мебозад.   Ҳамон гуна, ки забон, хат, расму оин барои  ҳар як миллат умдатарин муқаддас аст, ҳамонгуна барои давлатдорӣ  Парчам, Нишон ва  Суруди  миллӣ   рамзҳои  асосӣ  буда,  барои  ҳар миллат муқаддас маҳсуб меёбад. Донистани  парчами миллӣ  рамзи худшиносию  худогоҳӣ ва  меҳанпарастӣ  буда, муайянкунандаи  қудрати  сиёсист. Парчами  Ҷумҳурии  Тоҷикистон   рамзи  истиқлолият  ва соҳибихтиёрӣ  буда, инъикосгари  таърихи бойи  миллат  аст.  Ҳар он ҷое, ки  Парчами  Тоҷикистон  парафшон аст, он ҷо  садои  лафзи  тоҷикӣ   баланд  шуда,  ифтихори  миллии  сокинон   баръало  муҷалло мегардад. Парчами  давлатии  Ҷумҳурии  Тоҷикистон  матои  росткунҷа  буда, аз  се ранг  cурх, сафед ва  сабз  иборат   мебошад, ки     ҳар  яке  аз  ин  рангҳо  маънои   амиқу   таъсирбахшро  дороанд.   Устод Гулназар  дар  ин  маврид  гуфтаанд: Парчами  армони тоҷик, Шуълаи имони  тоҷик, Оташи виҷдони тоҷик, Сар  зада  аз  ҷони тоҷик. Рӯи ман  чун  ту  сурх, Бахти ман чун ту сафед  аст. Умри ман мисли ту  сарсабз, Ҷонам  аз  ту  пурумед  аст. Бо  баракати  соҳибистиқлолии  давлат  ва саъю  талошҳои   Пешвои миллат, Президенти  кишварамон  муҳтарам Эмомалӣ  Раҳмон   дар  маркази   ҷумҳурӣ  қомат  афрохтани  Парчами боҳашамату бовиқори миллӣ   арҷгузорӣ  ва  эҳтироми хосса  ба ин муқаддасот маҳсуб ёфта,  то  ба  имрӯз  дар ҷаҳон  назири худро  надорад.    Парчами    миллӣ  назокати  ба  худ хос  дошта,   рамзи  давлати  соҳибистиқлолу  озодии  Тоҷикистони  азиз  ва  орзую  ормонҳои  гузаштагони  мост, ки  ҷони  азизи  худро  баҳри барқарорӣ ва  пойдории ҳукумати  қонунӣ,  озодию  ободии  кишвар  нисор  кардаанд. Бояд  доимо  дар  хотир  дошт,  ки дифоъ аз Парчами  миллии  мо  дифоъ  аз нангу номуси  сар  ба фалак афрохтаи тоҷикист  ва  нишон  аз обрӯву  нуфуз  ва манзалати   тоҷикон   дар  арсаи ҷаҳон  аст.

Баракатулло Валиев                                                                                    сармуҳаррири нашрияи                                                                                   «Паёми Дӯстӣ»

Шарҳи худро гузор

Ваш e-mail не будет опубликован. Обязательные поля помечены *

*

code